巴塞打沉仇家

猪拉多纳

比比入廠，皇馬大鑊！今晚西班牙超級盃首回合由坐鎮魯營嘅巴塞隆拿迎戰皇家馬德里，焦點當然係維蘭路華同莫連奴呢對「仇家」對決！事實上，巴塞上仗重現「地上最強」氣勢，皇馬又有「巴塞剋星」比比唔出得，小妹決定直取1.6倍主勝，撐巴塞贏波，為曾經畀莫連奴插眼嘅主帥維蘭路華出番啖氣！（now632台周五凌晨4:30直播）

今場係上季西超盃「插眼事件」兩位主角─巴塞新帥維蘭路華同莫連奴第一次正面交鋒，相信喺濃厚火藥味下，絕對好睇過戲！不過「寸王」今場未必拎到咩甜頭，皆因由上場聯賽睇嚟，「地上最強」喺維帥領軍下加快咗行軍速度，唔再好似上季咁一味悶搓又攻唔入，特別係愈戰愈勇嘅「小白」恩尼斯達正式成為新進攻核心，由佢同柏度洛迪古斯、阿歷斯山齊士及美斯等聯手，要射穿死敵條弱化版防線並唔難。
皇馬大杉+馬些路上陣成疑

皇馬嘅防守主力馬些路啱啱踢完奧運，今場唔多似會出，不過最大鑊嘅係後衞比比喺首輪聯賽同隊長卡斯拿斯相撞搞到頭部受傷，雖然西班牙《阿斯報》大爆佢一出院就要求醫生畀佢踢呢場波，但醫生就斷然拒絕，仲話：「冇可能，你傻o架？」今場鐵定唔使預佢喇！

比比缺陣對皇馬嚟講絕對係極壞嘅消息，皆因佢過去4次缺陣對巴塞嘅賽事，皇馬只得1和3負劣績，真係唔到你唔信邪！呢位「球場殺人王」夠晒暴力，係少數可以有效阻截巴塞攻勢嘅防守球員，冇咗佢，班巴塞兵自然唔使擔心人身安全可以放心去攻，要喺魯營搞掂死敵絕對冇問題。
比比避戰巴塞皇馬1和3負

日期 賽事 皇馬戰績

2008/12/13 西甲 作客負0:2

2009/05/02 西甲 主場負2:6

2010/04/11 西甲 主場負0:2

2011/04/28 歐聯 主場和1:1
巴塞鬥皇馬連開6口大

‧巴塞連續3屆奪得西班牙超級盃，近6次喺主場對皇馬得3勝2和1負。

‧美斯係西超盃史上入球最多嘅球員，至今有8球進帳。

‧皇馬及巴塞近6次對賽全部開出「入球大」。
西甲打吡半場吼大

皇馬同巴塞近6次交鋒，半場必定有入球，而且有4場半場開入球大，撞啱皇馬今晚條防線唔多穩陣，巴塞上場對住皇家蘇斯達亦有失波，就算贏到，都隨時畀擅打反擊嘅「銀河艦隊」偷襲成功，大家不妨捧2.35倍半場入球大啦！
西超盃賽制

採主客兩回合制，若兩回合賽和，以作客入球較多一隊獲勝，若雙方總比數及主客入球數相同，則要加時30分鐘，若加時後仍未分勝負，則互射12碼決勝。