紅軍炒赫斯出氣

猪拉多纳

利物浦喺全世界都擁有最忠心嘅死硬派球迷，但對投X者嚟講就好頭痕，每當佢哋畀人睇好就令人失望，但又經常喺令人心淡時突然發威，真係捧又唔係反又唔係！今晚紅軍喺歐霸盃附加賽首回合作客對蘇超球隊赫斯讓波咁多，相信會令好多投X者卻步，不過Macot堅信利物浦今仗會有超強鬥志踢爭氣波，強捧「讓球客勝」。（周五凌晨2時45分開賽）
盡數重拾自信

利物浦今季換上年輕嘅羅渣士執教，但聯賽開鑼日即慘吞西布朗三蛋，令擁躉神傷，不過紅軍開咧首仗踢得曳已成慣例，我對佢哋仍然有期待。利物浦三日後要喺英超主場對上季冠軍曼城，下周中又要踢次回合，跟住下周末更要喺聯賽對死敵之一嘅阿仙奴，惡戰連場。紅軍上仗慘敗後必須搵機會踢番場爭氣波重拾自信，實力孱弱嘅赫斯係佢哋最佳發洩對象，今仗除咗要贏，仲會力求大勝，爭取喺首回合確保出線，下周中次回合就唔使咁嘥力，可以更專注兩場英超大戰。

或者你會問，利物浦對歐霸盃真係咁有興趣？Macot認為紅軍啱啱輸完一場咁肉酸嘅波，如果歐霸盃都搞唔掂蘇超弱旅就會成為笑柄，嚟緊呢兩個月佢哋都要耷低頭做人，何況紅軍現時喺英超好難同曼市雙雄相提並論，歐霸盃係佢哋其中一個可以爭取嘅目標，唔係雞肋！
赫斯級數差一截

Macot睇好紅軍另一原因係睇死蘇超球隊，英超球隊近年對蘇超球隊擁有壓倒性對賽優勢，蘇格蘭足球水準近年直線下滑，唯一勁旅些路迪喺歐洲賽場一直舉步維艱，其他球隊同些路迪比更加有一段好大差距，赫斯近兩場蘇超面對中下游嘅喜伯年同恩華尼斯都贏唔到，今晚難阻紅軍反彈，波膽我估利物浦贏3比0。
Macot推介：

利物浦讓球客勝★★★★

利雲特勝★★★

施拉斯克大★★★