巴塞閃攻皇馬奉陪

猪拉多纳

新球季首場西班牙國家打吡率先爆發！今晚西班牙超級盃首回合上季西班牙盃冠軍巴塞先喺魯營主場迎戰上季聯賽盟主皇馬。兩軍近況各走極端，巴塞喺新帥維蘭路華領軍下，火力更加得人驚，相反皇馬鬧中堅荒，上仗撞到爆頭嘅中堅比比，今仗不能披甲，勢必影響防守。呢場面子之戰，兩隊都想贏死敵攞頭威，兼挫對手銳氣，一定唔會縮，呢個大盤隨時半場已經搞掂。（now 632周五凌晨4時30分直播）
雙翼齊飛 「釋放」美斯

今季巴塞扶正助教維蘭路華擔正，佢喺沿用前任哥迪奧拿嘅戰術基礎上作出微調，例如起用柏度洛迪古斯同基斯甸泰路「雙翼齊飛」，重新加強兩邊側勢，不但可拉散對方防線，亦唔使太集中喺中路進攻，即時為美斯「解除束縛」，如脫韁野馬般生晒，並激活整個進攻體系。

維帥另一妙招，係刻意加快行軍速度以閃擊對手，此舉雖略為冒險，但的確令對手顧此失彼，上仗對皇家蘇斯達，開波15分鐘就入咗3粒，足見巴塞前段有幾積極。除了美斯外，柏度洛迪古斯、基斯甸泰路甚為搶韁，連養傷8個月嘅射手韋拿都弗番，一眾前鋒蠢蠢欲動，希望喺維帥面前爭取好表現。
面子攸關 冇得退縮

相反，皇馬不但喺首輪畀華倫西亞逼和，痛失2分之餘，守將比比同隊長卡斯拿斯頭撼頭搞到爆缸，仲要送院檢驗，呢場都係唔使預佢，另一中堅沙治奧拉莫斯亦額頭「見紅」，若起用久疏戰陣嘅艾比奧爾或者新仔華拉尼，必定影響防線嘅穩定性。

不過，以C朗、迪馬利亞、奧斯爾同賓施馬組成嘅豪華鋒線，加埋喺冷板候命嘅希古恩同荷西卡利祖，皇馬亦唔愁入唔到波。加上呢場面子之戰，皇馬教頭莫連奴同好勝王牌C朗，一定唔會認低威，維蘭路華亦希望擊敗死敵立威，兩軍勢必鬥攻求勝，呢個大盤實食冇黐牙，如果嫌分頭唔夠，可留意埋「半場大」。