連續兩屆打附加賽 撐烏甸下盤

猪拉多纳

意甲近幾年畀假波案同財政危機搞到天翻地覆，亦造就生力軍成功上位，連續兩屆取得歐聯參賽資格嘅烏甸尼斯就係其一！烏甸主帥古度連精明組軍，繼續由皇牌射手迪拿達利做重心，為咗準備對布拉加，更派專人起呢支葡超球隊底，咁有心有力，受讓平半信得過。（有線61及201周四凌晨2:45直播）

烏甸尼斯上屆喺歐聯附加賽抽中對阿仙奴，力戰出局無話可說，今屆抽中葡超新貴布拉加都算黑仔。不過佢哋可以連續兩屆代表意甲踢歐聯，已經證明實力唔簡單。吸取上季慘痛經歷後，今次準備更加充足，古度連賽前更特別派專員收集對手錄影帶同數據，更同全隊人一齊研究分析，所以古度連見記者時可以概括咁話：「布拉加充滿南美特色，注重控球同快速反擊，我哋會做好準備。」
布拉加友賽唔夠拿玻里砌

上季葡超季軍布拉加今個夏天都冇乜動作，希望靠原有班底再創佳績，但事實上佢哋冇乜新火花，季前熱身專登揀奧林比亞高斯、拿玻里同紐卡素等試下水，結果只得1和2負，對住實力同烏甸尼斯差唔多嘅意甲球隊拿玻里更輸1:3，可見隊波一旦出到歐洲舞台都係唔多掂，今場主場出擊都係信唔過。
頂占筍盤：烏甸尼斯（下盤）

兩隊半場都旺入球細

‧烏甸上季聯賽作客只得5勝，勝率約25%。

‧布拉加上季15場主場聯賽獲12勝，勝率達80%。

‧布拉加近10次主場，以及烏甸尼斯近10場作客半場大細，均為2大8細。
歐聯賽制

採主客兩回合淘汰制，今輪為附加賽首回合，若兩回合計總比數相同，作客入球較多一隊晉級，再和則於次回合後加時作賽。若加時入球數字相同，客隊將憑作客入球優惠晉級，若加時無入球，則需互射12碼決勝。