保地花高5.5倍晉級夠冷味

猪拉多纳

首回合淨吞兩蛋，保地花高想喺南美球會盃扭轉敗局，聽朝次回合返主場就要淨勝彭美拉斯3球，聽落好似好難，但查實彭美拉斯已經攞到來屆自由盃入場券，會方當正今季完成任務，戰意肯定及唔上對手，進取啲博5.5倍保地花高贏凸晉級。（廣東體育周四早上9:00直播）
彭美拉斯志不在此

彭美拉斯贏咗巴西盃之後鎖定來屆自由盃參賽資格，足球總監森派奧仲話，家陣已經開始為來季部署，首要任務係同年尾約滿嘅主帥史高拉利續約，呢隻南球盃仲想唔想要都成疑問喎！此外，彭美拉斯本身亦傷兵滿營，中場馬干費蘭度、佐治華迪維亞、丹尼爾卡維奴同阿辛卡奧等9位主將都打晒柴，難怪「大菲」話上仗輸畀戈亞尼恩斯場波都已經好難排陣。

保地花高要反勝晉級係有難度，但首席射手安達仙奴話明由吹雞開始就會全力搶攻，睇嚟鬥心唔錯喎。況且老將施多夫早前已經開齋，新兵盧迪路近仗表現又幾對辦，要反勝志不在此嘅彭美拉斯有幾難先？

首回合：保客負0:2
南球盃賽制

採主客兩回合淘汰制，今輪為初賽次回合，若總比數相同，作客入球較多一隊晉級，再和則於次回合後隨即互射12碼決勝。