富豪大對決 車仔打雷

猪拉多纳

今晚英超獨腳戲上演一場俄羅斯富豪班主大對決，由車路士主場鬥雷丁。不過無論係班主財力定球隊實力，車仔都係高雷丁幾班。加上車仔新兵夏薩特有料到，今場又係佢喺史丹福橋首個個人Show，肯定搏晒命。藍戰士強陣出擊炒硬雷丁，1.61倍「讓球主勝」夠穩陣啦！（有線200及300、廣東體育周四凌晨2:45直播）
藍戰士新兵夏薩特有料到

車仔油王班主阿布拉莫域富甲天下，財力雄厚無人不識，阿布泵水多年後，上季連歐聯都贏埋，實力有幾勁根本唔使力奇多講。雷丁呢邊個班主辛格維域治係富二代，老竇搞印刷生意都係有錢人，不過拍埋阿布身邊就當然食塵。雷丁今年初喺辛格維域治入股後，成績大躍進，最後贏埋英冠冠軍升上英超，今夏亦積極買人引入以普格恩耶克為首嘅幾個新兵，不過論卡士，同車仔比又係差一大截，點砌呀？

再者，睇番車仔今季初演出，輸咗個社區盾後，周日聯賽開咧戰輕鬆贏韋根2粒。新指揮官比利時球星夏薩特果然有料到，即刻交出助攻同博到12碼，睇嚟適應英超絕冇問題。新人賴恩貝特蘭上場踢左翼衞助攻助守同樣出色，有佢拍住轉打右翼嘅桑馬達雙翼齊飛，對手真係唔易頂。即使今場有中場拉美利斯因病缺陣，馬高馬連又話大腿傷休戰，但兵源充足有乜好驚！
雷丁訪史丹福橋腳軟

雷丁相隔4年後終重返英超，開咧戰1:1逼和史篤城搶得1分算唔失禮，不過上半場門將費達歷斯犯大錯累失波，呢個澳洲龍門始終難出大場面，今晚都係信唔過。事實上，佢哋以往去親史丹福橋都冇運行，從未贏過波，今晚連翼鋒占美基比都缺陣，想偷雞都難，輸2球係基本消費啦！
車仔主場鬥雷丁未輸過

‧車路士歷來9次主場對雷丁得5勝4和未輸過。

‧英超4次交手車仔3勝1和。

‧雷丁係上季英冠前5位球隊中入球最少一隊，46戰僅入69球。
乜都玩錦囊：雷丁唔慌搏吼佢輸大鑊

車仔今個月要應付英超同歐洲超級盃，咁多比賽梗係唔想夜長夢多，一落場就搏命，佢哋過往4次英超交手半場都贏1:0，呢個3倍半場波膽抵博。至於全場波膽，既然雷丁都知咁難打，一旦落後下半場隨時放軟手腳，15倍主其他博得過。