哥倫布搵多倫多着數

猪拉多纳

明早美職有兩場比賽舉行，其中哥倫布機員主場對FC多倫多。FC多倫多聯賽客勝率偏低，今場頗難威脅到對手，預料哥倫布機員可於主場解決多倫多，主W開出機會較高。（周四早上7時30分開賽）

FC多倫多近期演出都幾差，連續3場聯賽都未能夠取勝，難怪喺東岸積分榜排包尾。事實上球隊都對今季聯賽冇晒期望，相信會將目標轉到中冠盃，鬥志現疑點。而哥倫布機員亦有多場未能勝出，球隊極需一場勝利止住頹勢，既然FC多倫多稍作保留，哥倫布機員當然老實唔客氣，望憑主場之利痛擊對手。

另一場由華盛頓聯隊主場鬥芝加哥火燄，兩隊積分相當接近，為求爭取更高排名今場一定會全力拚搏，料雙方會大駁火求勝，大盤值得留意。