車仔大舉掃雷

猪拉多纳

車路士開咧戰以快打慢火速入兩粒搞掂韋根，踏入「後杜奧巴時代」後，「車仔」唔再靠單箭頭費蘭度托利斯爭取士哥，貴價兵夏薩特首戰交出兩個助攻盡顯身價，大軍今輪返主場迎戰升班馬雷丁，大可放膽壓前狂攻對手，有條件大勝一場，熱捧大盤！（有線300及200台周四凌晨2時45分直播）

車路士新兵夏薩特英超處子戰搶盡風頭，上半場七分鐘作出兩次助攻，成為贏波頭號功臣，貴得有道理！隨住杜奧巴離隊，「車仔」主帥迪馬堤奧銳意改變踢法，費蘭度托利斯於前線扯散對手防線，為夏薩特、桑馬達及林柏特等中場製造空間後上攻門，令對手更難防。除夏薩特外，另一新兵奧斯卡杜斯山度士上仗後備落場都幾對辦，呢個巴西新星埋門把握力強，將成球隊另一尖刀。
阿布恨睇性感足球

車路士上場作客早早贏住兩粒，之後攻勢放緩畀對手壓住揪，贏來唔算好Sharp醒，老細阿布季前拎咁多錢擴軍，絕對唔想睇悶波，主帥迪馬堤奧及一眾球星會識做，今次返到史丹福橋球場出戰，對手只屬升班馬，相信唔會好似上場咁贏緊就懶懶閒，即使領先都會繼續爭取士哥。射手費蘭度托利斯長期被插低產，難得近期回復勇態表現生猛，肯定唔會放過任何士哥機會。
雷丁門將手騰腳震

雷丁上仗主場同史篤城各一言和，踢來不過不失，但門將費達歷斯手騰腳震，要為失球負上最大責任，此子揚言會力阻車路士士哥雪恥，大家聽住先啦！雷丁前線最有分量射手叫做普格恩耶克，「車仔」後防並非密不透風，唔排除呢個俄國前鋒可於反擊取得甜頭，唔使食蛋咁慘情。

車路士上季聯賽主場19戰14大5細，大盤率逾7成，新季於主場勢必踢得更放，預期會續吹大風，今場可捧入球大！