拜仁炒得 新援文迪蘇傑顯顏色

猪拉多纳

拜仁慕尼黑今晚喺德國盃首圈賽事作客乙組仔雷根斯堡，雖然小妹覺得拜仁會當今場係開咧前最後練兵機會，但唔代表佢哋會Hea踢，上場德國超級盃戰勝死敵多蒙特令佢哋信心大增，今場實行血洗對手再示威，讓2球照捧2.08倍「讓球客勝」！（無線翡翠台周二凌晨2:30直播）

拜仁喺德超盃終止對多蒙特嘅5連敗走勢，佢哋除咗捧走2年多以嚟首個錦標，最令球迷開心嘅係，新援文迪蘇傑處子上陣即刻交出1入球1助攻，表現搶晒鏡，難怪呢位射手勁有信心咁話：「拜仁可以贏盡一切，所以我先嚟！」小妹睇好佢成為拜仁今季新王牌，就算馬里奧高美斯傷緊唔出得都冇有怕，睇嚟拜仁對家以後除咗要嚴防「超級馬里奧」外，家陣又要防多個心腹大患。
雷根斯堡啱啱升德乙

超級盃場勝仗最重要嘅並唔係個盃，係令隊波走出上季連失聯賽同歐聯嘅陰影，重拾自信，就連上季連環射失關鍵12碼、歐國盃又畀人插爆嘅洛賓，都話球隊終於重返正軌，打番起信心！

雖然話列貝利、湯馬士梅拿等國腳級人馬，上周中踢完國際賽後未必正選上陣，但係唔好忘記新援比沙路同梳頓沙基利等都係極具級數嘅球員，要血洗啱啱升上德乙嘅雷根斯堡並唔係難事，何況主隊仲有前鋒湯馬士告斯未必出得，火力大減，要破蛋已經難過登天，不如輸少當贏仲好喇！
德盃賽制

今輪為第一圈，以一場過分勝負，若法定時間打成平手，需加時作賽，再和就互射12碼決勝。