韋斯咸扑散維拉

猪拉多纳

今季我哋球彩台幾位女將會留守「東方波經」同大家分享心得，祝大家新一季繼續贏到開巷！今日「8．18」英超開鑼，我呢個超級「紅魔」粉絲當然會力撐愛隊周一作客射爆拖肥糖。但除咗大家熟悉嘅英超強隊外，升班球隊都不可忽視，話晒上季英超三支升班隊最後都留守到尾，唔使降班o架！

今季三隊，我就較睇好「錘仔幫」韋斯咸有得留低，原因有兩個。首先，歐洲莊家所開出嘅英超降班隊伍賠率，頂頭大熱三甲係雷丁、修咸頓同諾域治，並冇韋斯咸份（雖然佢哋降班賠率都算熱）；其次「錘仔」陣中多位球員有英超經驗，如隊長路蘭、上季助攻王馬菲泰萊及中場麥克盧保等，人腳質素唔錯。我最欣賞呢隊波入球能力強，上季46場英冠入81球，喺艾拿戴斯帶領下大踢進攻足球，而佢哋前鋒線上亦有好多頂得之人，例如卡頓高爾、路蘭，所以佢哋入球當中差唔多有四分之一係頭槌，制空能力頗強。
維拉客勝率唔開胃

「錘仔」升班後積極擴軍，最貴交易係由法甲索察買入高大前鋒邁加，呢位馬里射手無論頭頂腳踢功夫都到家，大家要落足眼力睇睇啊！雖然韋斯咸季前熱身賽嘅賽績唔算太靚，但好多場都係作客，今晚係重返英超後首場主場賽事，氣勢旺盛，贏波機會高。

韋斯咸今場對手係阿士東維拉，基本上維拉每季唔使降班就已經心滿意足，今季預計都係冇咩驚喜，成為中游分子咁啦！今季主要有「大舊衰」希斯基同中堅占士哥連斯（咁啱就係轉投韋斯咸）離隊，影響一定有。上季維拉作客勝出率只得一成六，今場即使係面對升班球隊都唔敢支持。馬會呢場有開讓球盤，一於敲小讓平半嘅「錘仔」上盤。

（有線304及204台周六晚10時直播）
Wendy推介

韋斯咸 對 阿士東維拉

韋斯咸 上盤