曼城「食老本」都掂

猪拉多纳

英超「百億大戰」今晚爆發！英超衞冕冠軍曼城及上屆足總盃冠軍車路士，今晚會於維拉公園球場力爭社區盾，為新一季英超揭開戰幔！兩路大軍身價夾埋足足達到8億鎊（約97.3億港元），令呢場大賽添上濃厚銅臭味，但就班底嚟睇，即使曼城喺今夏轉會窗冇乜大動作，相信仍然有力擊敗豪使換血嘅車路士，讓平半一於捧1.94倍上盤啦！（now633及660台周日晚8:30直播）
車仔燒8.5億增兵3連敗

車路士今夏喪使近7,000萬鎊（約8.5億港元）換血，買入奧斯卡杜斯山度士、馬高馬連及夏薩特等小將，令班底身價高達3.6億鎊（約43.8億港元）！可惜前兩者分別因為奧運同傷病今場要缺陣，而且杜奧巴又去咗上海申花，接班嘅費蘭度托利斯可唔可以發揮類似作用？實在令人懷疑。無疑件新兵夏薩特質素係高，但邊有咁快磨合到先？最弊嘅係佢哋喺熱身賽表現差強人意，連輸3場，唔怪得領隊迪馬堤奧都大嘆失望啦！
近5屆衞冕冠軍贏4次

另邊廂嘅曼城雖然未有增兵，但呢支球員總身價達4.4億鎊（約53.5億港元）嘅英超冠軍，單係「食老本」已經夠贏，先唔講狀態大勇嘅阿古路，有7次喺本土賽對車路士入6球嘅「拆車能手」泰維斯喺度，入波已經有一定保證，何況隊長兼後防靈魂高柏尼復出，班前線球員更加可以放心去攻，冇咗加里夫巴利、米卡李察士兩個都唔使驚！

最緊要嘅係，近5屆社區盾有4次都係由英超衞冕冠軍奪得，撞啱車路士近4次踢社區盾，都未試過喺法定時間內獲勝，曼城要開出上盤又有咩難先？
橫數千軍

車仔熱身賽勝率低

‧5場季前熱身賽1勝1和3負，共失10球，當中3場開大。

‧9次參與社區盾（前身慈善盾），共4次奪得錦標。

曼車戰慣臨尾分勝負

‧6場季前熱身賽共得4勝1和1負，只係失過1球。

‧近3次對賽，致勝球均於最後15分鐘內攻入。
社區盾及德超盃賽制：

若喺90分鐘內打成平手，要加時決勝負，若加時後仍未分出高下，就互射12碼決勝。