蜜蜂兵為德超盃仆心仆命

猪拉多纳

多蒙特上季被批評放棄歐聯專攻聯賽，新一季歐聯佢哋亦未定獎金制度，不過佢哋對國內大小盃賽就特別緊張，除咗上季捧咗德國盃外，球隊亦全力推動德超盃，係呢個盃賽得到德國足總認可嘅最大功臣。

德超盃於1987年至成為德國足總官方賽事，但舉辦10屆後被規模較大嘅德國聯賽盃取代，但該盃賽一直唔算成功，得唔到球迷同球會大力支持，直至2008年，多蒙特發起復辦超級盃，仲主動聯絡贊助商，喺未受德國足協認可下，第一屆就喺主場贏咗拜仁2:1，翌年禾夫斯堡則於主場輸畀雲達不來梅，直至2010年德國足總終於重新認可呢個盃賽，上屆多蒙特喺作客情況下賽和史浩克，最終射輸12碼。
入場觀眾直播齊破紀錄

今屆德超盃受注目程度進一步提升，安聯球場69,000張門票已告售罄，肯定打破上屆喺史浩克球場嘅61,000最高入場球迷紀錄，全球199個電視台直播今晚比賽，亦創歷史新高。