社區盾 車仔VS曼城

猪拉多纳

英超新球季將於8月18日展開，英格蘭社區盾今晚開戰熱定身，由上季英超冠軍曼城於中立場維拉公園球場決戰足總盃冠軍車路士。「車仔」上季靠王牌射手杜奧巴捧走歐聯同足總盃，如今「魔獸」一去，得番「王子」費蘭度托利斯實在靠唔住，優質新兵夏薩特亦需時適應，相信曼城有望一搔40年之癢捧走社區盾，小讓平半要上盤！（now 633及660周日晚8時30分直播）

由於溫布萊要舉行奧運賽事，今場改於維拉公園球場上演，中立場舉行，依然公平公正。先講車路士今夏有乜動作，最大變動必屬放走超級射手杜奧巴，上季「魔獸」搏晒老命幫「車仔」贏得足總盃同歐聯冠軍，經典場面至今仍歷歷在目，如今良將一去，球隊仲未搵到新中鋒頂上，被迫用費蘭度托利斯，「廢托」雖於歐國盃做咗神射手，但始終未復舊觀，靠佢？算罷啦！
車仔換緊血未夾掂

車路士正處換血重整期，教頭迪馬堤奧坐正後獲老細阿布開水喉支持，先後簽下馬高馬連、奧斯卡杜斯山度士及夏薩特，馬連有傷，奧斯卡踢緊奧運，今場只得夏薩特踢得，呢個比利時球星於法甲橫行無忌，被捧到上天，但去到英超始終要時間適應，睇番之前啲熱身賽，仲要同班隊友夾多啲。「車仔」今夏喺熱身賽冇乜邊場踢得好，早前作客英冠球隊白禮頓輸得難睇，信唔過！

另一邊廂曼城以不變應萬變，並非教頭文仙尼唔想變，無奈球會今夏於轉會市場處處碰壁，截至目前為止未有新兵加盟。以曼城人腳，根本唔使特別買人，前線阿根廷雙雄阿古路同泰維斯早早歸隊，於熱身賽頻頻落場打起狀態，中場核心耶耶托尼同樣已操弗。

曼城上季取得44年來首個頂級聯賽冠軍，真係用錢買到冠軍，佢哋上次贏社區盾已經追溯至72年，今次有望再捧盃。
有績可尋

近年社區盾經常上演入球騷，如以中位數2.5球計，近3季總入球都開大，不過如以半場大細中位數1.5球計，當中有2次上半場都開細，代表好多時候球隊都在下半場先會搏槌，玩即場投X嘅朋友值得留意。
近3屆社區盾戰果

2011 曼聯 3:2（0:2） 曼城

2010 曼聯 3:1（1:0） 車路士

2009 車路士 2:2（0:1） 曼聯 （車12碼勝4:1）