水手私房菜專食天鵝餐

猪拉多纳

日職下游球隊新潟天鵝近況回勇，但今輪有三大主力停賽，包括兩大射手般奴盧比斯及矢野貴章，殘陣作客橫濱水手實死冇生，捧主勝！（now 633及660周六下午６時直播）
天鵝斷箭九死一生

新潟天鵝上半季戰績極曳，一度跌至尾二，近期演出明顯有改善，對上六戰不敗，但今場面對極大考驗，兩大射手般奴盧比斯、矢野貴章同中場本間勳坐波監，加上近兩次聯賽作客橫濱水手輸晒，人唔齊，績又唔靚，反啦！

同日名古屋鯨魚作客清水心跳，鯨魚前線天殘地缺，但中堅田中鬪莉王串演中鋒勁到爆，近三場一條友入六粒，勒都勒唔住。心跳剛過去周中喺聯賽盃尾段奇迹反勝鯨魚四比三，兩隊匆匆再戰，勢將再演入球騷，捧大冇壞！
柏雷素爾夠料贏東京

另外，柏雷素爾狀態全面回勇，已經重返爭標行列，會方早前簽埋千葉市原舊將尼圖拜安奴，呢個巴西中鋒有啲級數，依家球隊中前場人腳充裕，絕對有條件爭冠。柏軍今輪主場對ＦＣ東京，對手近況麻麻，相信呢個主Ｗ冇走雞！