威廉二世NAC「細」均力敵

猪拉多纳

新一季荷甲今晚開波，不過打頭陣唔係咩老牌爭標勁旅，反而係新升班嘅威廉二世，主場迎戰三線球隊NAC。兩班波到依家都未執好個陣，前鋒線睇落都信唔過，加上開季第一擊，大家唔想輸，踢法或較保守，今場敲2.05倍入球細冇衰。（開賽時間：周六凌晨2:00）

威廉二世上季透過附加賽攞到升班資格，講實力，新季要喺荷甲站穩陣腳絕對唔易。佢哋之前希望及早將上季由維迪斯外借嚟嘅前鋒史尼達斯簽入，但到依家仲未落實合約，最後搞唔搞得掂都唔知。但係呢個荷蘭新人一向入球率唔高，嚟到都幫唔到幾多。睇番佢哋之前熱身賽，踢5場都未贏過，夾埋先入得4球，唔通呢場幫你開大咩？

NAC呢邊，上季喺荷甲都係排13位，實力唔突出。佢哋今夏簽入唔少新球員，但衰在又係冇個得。據聞球隊最大期望係前鋒新兵夏度亞，不過力奇搵過佢資料，呢個由威廉二世出身嘅倒戈前鋒，上季踢完洛達，就借咗去德乙亞琛踢多半季，結果冇入波搞到人哋降班，NAC諗住靠佢，隨時死得仲快，今仗想入番球都難呀！