日本「+1」狙擊美國

猪拉多纳

奧運女足好戲在後頭，今晚終於上演巔峰對決，兩大高手日本同美國聚首足球聖殿溫布萊，合演去年世盃決賽翻版戲碼。作為上屆奧運金牌得主，「美女」確實係好波，不過日本防守穩健，演出漸入佳境，有力頂住對手嘅狂轟猛炸，難得「瀛女」有得受讓，一於撐「讓球客勝」。（有線63及203台周五凌晨2時45分直播）

自去年喺世盃決賽互射十二碼飲恨，美國球員至今仍耿耿於懷，一直希望喺今屆奧運搵日本報番一箭之仇。因此該隊好快入局，其略帶英式嘅勇猛球風，無論係老將雲芭芝夥拍雅歷絲摩根嘅鋒線，還是萊德、娜賓露組成嘅輸血管，總係逼到對手有氣冇碇抖，睇得出眾女對勝利、復仇嘅決心，其中雲芭芝更場場有士哥，弗到漏油。但「美女」嘅決賽對手，正係球風相剋、耐力驚人嘅日本，要報仇就唔係咁容易！
瀛女三線弗到漏

雖然開局有啲慢熱，但「瀛女」表現一場比一場好，其中澤穗希嘅狀態回升最關鍵，呢位隊長瞻前顧後，串連攻守，有佢喺度成隊波淡定好多。日本今屆亦打起咗「女保方」福元美穗，由於「瀛女」打法以防守主導，令佢哋經常被對手圍攻，好彩有福元妹左飛右撲，加上夠晒搏命嘅防線，就算今仗對住「美女」嘅狂轟猛炸，慣晒捱打嘅日本亦可「逆來順受」。

至於近兩仗都有入波嘅大儀見優季，係突擊型快速前鋒，最怕你唔攻，當對手空群而出，佢一個唔覺意偷雞成功都唔奇。其實兩軍實力旗鼓相當，勝負難料，但話晒今場都係冠軍戰，預計會踢得較為謹慎，既然日本有得受讓咁筍，「讓球客勝」點可以錯過呀！