曼聯細弱難炒華拉倫加

猪拉多纳

今夏熱身賽表現麻麻嘅曼聯，今晚喺挪威奧斯陸搵華拉倫加拍跳。紅魔鋒線異常疲弱，雖然射手朗尼已歸隊，但預計佢今場唔會上陣，主隊華拉倫加守強攻弱，看來紅魔會同前幾場一樣贏得艱苦，捧細盤最穩陣。（now 640周日晚10時直播）

賽前曼聯領隊費格遜大吐苦水，話依家球隊陷後衞荒，首先係達施華兄弟，一個踢緊倫奧，一個借咗去昆士柏流浪，莊尼伊雲斯同基斯史摩寧都受傷，後者仲要抖十個禮拜，隨時得番四個後衞可用。
尼曼查維迪傷愈復出

不過斯維覺得曼聯因禍得福，因為剩番四人係菲爾鍾斯、里奧費迪南、艾拉同尼曼查維迪，點秤都勁過上述幾位喇，後三者更係夾慣夾熟，特別係尼曼查維迪養傷八個月之後，今仗終於復出，有番呢位鐵血隊長坐鎮，紅魔成條防線都穩陣好多，等閒球隊難越雷池半步。
吼埋「讓球和」

曼聯王牌朗尼剛剛歸隊，於操練中輕舒腳頭，但預計費爵爺唔會咁快派愛將上陣，只會續用馬捷達、貝碧托夫、碧比，觀察幾位邊緣人嘅表現。雖然新加盟嘅日本天王香川真司對FC上海有士哥，但佢同隊友仍需磨合，而「小豌豆」查維亞靴南迪斯又未弗，睇番近三仗只入三球嘅產量，唔好對該隊鋒線寄予厚望。

主隊華拉倫加難得同曼聯拍跳，但面對尼曼查維迪領銜嘅防線，都好難搵到食，該隊會先做好防守同對方周旋，以紅魔集體低迷嘅鋒線，就算贏波都小勝居多，唔慌多波入，細盤有計，不妨吼埋「讓球和」。