首輪旺細 些路迪炆鴨僅熟！

猪拉多纳

翻查近四季蘇超開咧戰，都有一些特別數據，值得留意。傳統班霸些路迪實力雄厚，近四季首輪全勝不足為奇，但「綠白軍」可能狀態未起，贏波都冇乜鑊氣，有三場波開細，略欠勁旅本色。

除了些路迪之外，其他球隊的入球能力都麻麻，例如赫斯、聖美倫、登地聯，近四季都有三場首輪賽事「細眉細眼」，因此細盤屬穩健之選。不過，凡事總有異數，好似馬瑟韋爾，竟於四場開咧賽事全數開大，其入得又失得的風格，益晒一眾大盤客。基於各隊攻力欠銳，好容易出現和波賽果，上季六仗開鑼首戰中，就有四場平分秋色，赫斯、聖莊士東、聖美倫、登地聯近兩季首輪均和氣收場，不妨冷敲和波。
留力下周中踢歐聯

至於是日推介，斯維就對頭場些路迪對鴨巴甸的細盤情有獨鍾。（now 638周六晚7時45分直播）不但些軍於首輪旺細，該隊下周中要遠征芬蘭，出戰赫爾辛基打歐聯次回合，由於首回合「綠白軍」只領先2比1，唔係出硬線，加上今季冇咗宿敵格拉斯哥流浪，蘇超冠軍可謂唾手可得，些路迪更想在歐聯爭取好成績，今仗略作保留亦無可厚非。鴨巴甸防守唔錯，乘對手心有旁騖，有力一戰，相信些路迪就算贏波，過程都會好艱苦，細盤有計，不妨留意埋有分頭的「讓球和」。