捧日本娘子軍「客勝」

猪拉多纳

倫奧女足8強大戰今晚爆發，巴西女足面對日本女足，讓波未必有着數。雖然巴西女足連續兩屆拎到亞軍，但日本日前收起7件正選，隊長宮間綾唔忿氣被唱衰，公開作出反擊言論，加上對南非一仗引起打假波疑雲，呢場踢爭氣波1.55倍「讓球客勝」抵捧！（有線18、63及203周六凌晨0:00直播）
森巴女將踢法單調

唔知係咪成日要靠女球王瑪達同射手姬絲蒂安妮數胡，打法容易被睇穿，巴西女足近年總係令人覺得唔穩陣，對住實力比較強嘅對手就現形，今次倫奧首戰以5:0大勝喀麥隆後，跟手只能夠以1:0砌低新西蘭，日前更衰到以0:1慘負東道主英國，淪落到要同女子世盃冠軍日本女足硬撼。

另方面，日本女足頭場以2:1險勝加拿大，緊接對瑞典女足同南非女足，都只能夠同對方踢成0:0，上場仲傳出教練發放「禁入波令」，據講隊長宮間綾唔妥傳媒質疑同批評，罕有火爆作出反擊，睇得出佢哋好唔滿意被批評。其實只要心水清，就會知道日本女足同瑞典女足打和，可以攜手出線大家開心，咁又使乜亂博嘥彈藥呀？
國際足協接納留力解釋

日前日本女足被南非女足摸和，正選陣容只係保留得宮間綾同3個後衞，日本女足教練佐佐木則夫話安排副選出戰，吩咐球員和波都得，只不過係唔想要F組首名，8強需要移陣地去蘇格蘭，可以繼續留喺卡的夫比賽，而且國際足協已經接納，所以唔會好似國際羽聯對打假波女雙球員咁作出嚴懲，由於佐佐木則夫預定9月急流勇退，為咗令佢風光離隊，相信球員會全力爭金作為告別禮！
奧足淘汰賽賽制：

淘汰賽階段如於90分鐘打和，將加時30分鐘，再和則互射12碼決勝。

猪拉多纳