紅軍未夾熟作客捱細界

猪拉多纳

歐霸盃第三圈外圍賽首回合，利物浦作客白俄羅斯球隊高美爾。紅軍今夏變天，新帥羅渣士要執好隊波十畫未有一撇，主力如謝拉特、丹尼爾艾格等冇態，新兵波連尼又未夾熟，預料一班新仔作客冇甜頭，捧細最啱。（周五凌晨2時開賽）

利物浦今夏重新來過，羅帥轉打433陣式，並配合小組搓波踢法，紅軍班兵要由頭學過。於三場熱身賽所見，紅軍僅得其形而未有其實，係就係搓到，但入肉埋門少之又少，僅得二和一負劣績，就知紅軍未有料到。事實上，球隊大部分主力都未有狀態，蘇亞雷斯、比拿美又踢緊奧運，波連尼暫時都係得個走字，相信羅帥會續用舒維爾、史比寧、查理阿當、法拿根等二線兵，整體狀態、實力都唔突出，作客惡踢，要入波唔易。
高美爾防守力強

白俄超於三月就開始，目前正值季中，高美爾狀態當然在對手之上。球隊於主場防守力強，八場聯賽失得四球，近四場歐霸盃僅失一球，今戰雙方或悶戰一場。