三神惡客搶愛媛

猪拉多纳

日乙今季改制，除有機會出現降班球隊外，仲整多個升班附加賽，三至六位爭一個位，有嘢爭自然激。依家榜首陷入大混戰，頭六位差距只得四分，大分三神位處第六，唔想跌出升班附加賽區，今輪作客FC愛媛，趁對手態沉搶分，受讓要下盤！

（周日下午5時開賽）

大分三神今季以土炮加南韓兵組軍，決心重返日職，效果唔錯，前面主要踢兩個日本前鋒，森島康仁同三平和司各有九球進帳，前者屬大阪櫻花青年軍優質出品，○六年十八歲已出道，初期被捧為超新星，但一直踢唔起，轉投三神載浮載沉，依家終於交到貨，若能助球隊升班，職業生涯有望重上正軌。三神客場三連勝，質高有態，反觀愛媛近六戰只贏一場，績曳難靠，讓波當然要反！
櫪木密密食抽埋「水」

同日櫪木SC主場對水戶蜀葵，櫪木踩行油爭升班附加賽入場券，連續五場贏波，贏在後防穩，大軍近五戰四場保持清白之身，五場加埋失一粒，日乙球隊好少咁穩定，櫪木家陣個勢可遇不可求，今次小讓平半唔過分，捧上盤。