森巴兵半場大起白俄

猪拉多纳

奧運足球風頭躉始終係巴西男奧足！「森巴兵團」星光熠熠，尼馬、侯克獨當一面，首場分組賽頭30分鐘已轟入３球，鋒力無堅不摧。今戰對手白俄羅斯瓣瓣都輸幾條街，計拿仁話捧「半場大」可以快啲收錢最醒神！

（有線63及203台周日晚10時直播）

巴西男奧足派出「鑽石陣容」，力圖問鼎該國史上首面男足金牌，陣中「進攻鐵三角」為尼馬、侯克同李安度達美奧，隊長中堅堤亞高施華身價高達4,200萬歐元，難怪摘金賠率僅得1.7倍。

早前熱身賽作客英國男奧足，半場輕輕鬆鬆領先兩粒；分組賽首仗鬥埃及男奧足，頭半個鐘已攻入三球，簡直係超晒班。巴西見大局已定，下半場有所放鬆，最後贏３比２完場，睇到呢班波恃才傲物，博佢哋淨勝３球有暗湧；而佢哋慣咗一開波就嚟料，白俄根本唔夠砌，「半場大」有1.95倍分頭好路。
埃及贏得新西蘭

同組另一仗埃及鬥新西蘭，埃及首仗雖敗不辱，巴素利前鋒穆罕默德沙拿好搶鏡，下半場同「超齡球員」艾阿里中場阿布捷卡各入一粒，質素、實力都遠超對手，簡單捧主勝。