粉紅兵團開「大」騷氹粉絲

猪拉多纳

奧運女足第2輪分組賽今晚爆發大戰，日本女足喺F組遇瑞典女足，玩入球大最穩陣。「粉紅兵團」上仗贏波，令東瀛再掀女足熱，全民「奸爸爹」，除咗陣中主力嘅「媽打」同好友拉隊去英國，神戶嗰邊仲搞埋個奧運優惠，齊齊為「粉紅兵團」助威，日本女足應該會識做，同瑞典開入球騷氹粉絲！（有線18、63及203周六晚7:00直播）

女子世盃冠軍「粉紅兵團」首戰以2:1砌低加拿大，入球功臣係中場川澄奈穗美同隊長宮間綾，最難得係熱身賽冇正選踢嘅澤穗希，上仗重新獲得信任踢足90分鐘。要知日本女足最具威脅力嘅後備前鋒丸山桂里奈同岩淵真奈仲未登場，大把秘密武器可以入波。
神戶舖頭半價賣牛肉祝捷

「粉紅兵」上場波咁威，搞到日本女足熱升溫，最近有少女球迷用國旗油上塊面打氣，講到啦啦隊，前鋒大儀見優季就最威，事關佢嘅東海大學同學搞咗應援團，「阿季」個媽打仲會同岩清水梓嘅媽咪，孖住去英國打氣，夠晒落力。

咁都未算，日本神戶中央區嗰度嘅大安亭市場，食住「粉紅熱」特別推出「奧運價格」優惠，100克神戶靚牛肉只賣1,000日圓（約99港元），等於平時一半嘅價錢，吸引咗大批市民搶購。據講効力INAC神戶嘅川澄奈穗美，就最鍾意歎呢種高級牛肉。女足喺日本咁Hit咁多人撐，今晚點睇都唔似會悶親觀眾。
瑞典首戰大勝火力勁

對家瑞典首戰以4:1大勝南非女足，兩位射手舒蓮同翼鋒達姬絲都有波入，狀態仲弗過女子世盃嗰陣，既然今屆奧運女足勁旺入波，首輪分組賽每場平均有成3.67個入球，今鋪F組兩大出線熱門駁火，追2.05倍入球大啱數！

女足F組