曼城谷起爆廠

猪拉多纳

英超大戰移師北京鳥巢上演，由上季聯賽冠軍曼城決戰阿仙奴，兩隊唔齊腳，殘鬥殘，相比之下，曼城經過幾場熱身賽後已逐漸上力，反觀「兵工廠」上次喺馬來西亞醜陋地贏波，明顯不在狀態。曼城空降北京備受矚目，連國際巨星成龍都撐，聲勢浩大，個勢贏埋，W得！（now 632周五晚8時直播）

曼城奪取英超冠軍後冇懶懶閒，話咁快已踢咗三場熱身賽，首戰不敵沙特阿拉伯球隊希拉爾勁羞家，次仗悶和德乙球隊特雷斯登仍然曳，上場戰勝土耳其勁旅比錫達斯開始嚟料。大軍寓賽於操，阿根廷兩大射手泰維斯同阿古路已上力，雖有多位主力參戰歐國盃後休戰，但仍有托尼兄弟撐住中後場，尚算穩陣。
兵工廠難擋阿根廷雙箭

阿仙奴正值重整期，王牌球星尹佩斯離隊在即沒有東來，新兵普多斯基及基奧特未有隨隊，今次亞洲之旅大軍攻擊球員缺點多，謝雲奴產量低，查馬克雪到硬晒，禾確特冇態，阿歷士張伯倫欠經驗，亞洲兵宮市亮未夠班，難怪上次對住馬來西亞明星隊陷入苦戰，贏來毫無說服力。

曼城今次以英超王者身份殺去中國掘金，決心與同市死敵曼聯爭取內地龐大市場，肯定想踢場好波取悅球迷，計質計態，球隊都在阿仙奴之上，今場贏面較高。