銀河英超3寶搶劫白帽

猪拉多纳

蘇格蘭足球戰術落後、一味靠斬，溫哥華白帽聽朝喺美職主場對洛杉磯銀河，唔值得冷敲。近期白帽實行「蘇格蘭化」，可惜新加盟嘅蘇格蘭國腳級射手堅尼米拿呢場仲未踢得，相反銀河陣中嘅「英超3寶」碧咸、當路雲同羅比堅尼都同時着火，平手盤當然要捧場。（開賽時間：周四早上10:00）
白帽新兵堅尼米拿未出得

雖然溫哥華白帽教練馬田雷利係蘇格蘭人，但從未喺美國以外地方執教，擺明領軍功力有限，即使白帽近6場得1勝2和3負，高層依然對馬田雷利投以信任一票，容許佢將球隊繼續「蘇化」，唔計助教保羅列治同最近來投嘅中場巴利笠臣，仲有新加盟嘅前卡迪夫城射手堅尼米拿等住上陣，諗住用高佬陣及體力化戰術搶分，達成出席季後賽嘅願望。

不過咁，作為「特定球員」嘅射手堅尼米拿，據講唔會落場住。相反，銀河最近火力全開，碧咸落選英國奧運隊、當路雲傳被踢返去愛華頓、羅比堅尼喺歐國盃3戰全敗出局，似乎激發佢哋同時踢爭氣波，帶挈銀河近7場有5勝2負，喪入18球，當中有13個由「英超3寶」攻入，證明佢哋真係好想證明自己，呢場好有機會又入波，咁有勢，唔似會突然走樣喎！