王牌「壽司」登場

猪拉多纳

上季喺英超爭霸功虧一簣嘅曼聯，今晚展開新球季嘅「周圍飛」熱身賽第一擊，作客南非德班市同阿馬祖路踢熱身賽。咪以為紅魔今次唔齊人就好恰，查實呢個以老帶新嘅陣容鬥心同質素兼備，加上有萬眾期待嘅王牌「壽司」香川真司登場，帶住班小將爭上位一定搏命，一於照捧1.8倍「讓球客勝」啦！（now640台、廣東體育周四凌晨2:00直播）

曼聯嘅季前熱身賽幾乎去勻全世界，合共踢6場波就會去南非、中國、挪威、瑞典同德國5個國家，總共要飛22,000公里，都咪話唔辛苦。不過為咗搵錢兼備戰新球季，環球之旅當然唔敢揸流攤。
曼聯歐國盃戰將未歸隊

事實上，雖然話紅魔日前公布頭3場熱身賽嘅名單，以朗尼同拿尼為首等歐國盃國腳球星全部未歸隊，大軍目前就只靠里奧費迪南同史高斯等經驗老將帶住，但其實好似日本球星香川真司、由克魯加盟嘅小將歷克鮑維，以及今晚會擔正左閘位嘅新星比歷基治等，都要為新一季爭位努力，仲有由土超回歸嘅射手碧比，同埋傷愈歸隊嘅中場路爾斯安達臣，亦要證明自己嘅存在價值，佢哋落到場又點會唔搏命吖！
阿馬祖路靠土炮冇料到

再者，紅魔話晒都係英超老二，係世界頂級球隊，反觀今年慶祝創會80周年嘅阿馬祖路，莫講話名氣唔大，佢哋上季喺南非聯賽都只係排第7，實力唔算突出。大軍入面除咗一班土炮，就只得幾個津巴布韋外援，真係搵個出名啲嘅球員都冇，今晚都係輸少當贏算數啦！

猪拉多纳