哥列迪巴絕地反擊搶W

猪拉多纳

巴西盃決賽次回合聽朝勁爆上演，哥列迪巴喺主場再遇彭美拉斯，主隊首回合落後0:2肯定要搏命，而且佢哋上屆已經飲恨屈居亞軍，輸波邊緣話唔定會燃燒小宇宙威番鋪，迎接即將回歸嘅費倫巴治中場阿歷士，主勝熱到得1.72倍要跟進。

（開賽時間：周四早上8:50）

上屆哥列迪巴兩回合計同華斯高踢成3:3平手，最後因為作客入球唔及對手飲恨，點知今屆再入決賽，首回合又落後兩球，呢場又有中堅艾馬臣杜斯山度士停賽，形勢上真係凍過水，好在都有人肯雪中送炭，曾經長時間入選巴西國家隊嘅阿歷士話，假如費倫巴治保證唔到佢有足夠上陣時間，就會選擇返哥列迪巴踢波，為咗唔好令阿歷士同球迷失望，相信哥列迪巴會全力開W燃點爭標希望。
彭美拉斯作客對賽輸蝕

另一方面，彭美拉斯都有前鋒盧恩盧沙、巴高斯同中場韋斯利盧比斯因傷避戰，陣容唔算完整，雖然教頭史高拉利解釋，由於要兼顧巴西盃，聯賽踢得唔好都冇辦法。但要留意嘅係，其實彭美拉斯近5次作客哥列迪巴得1和4負，包括上屆巴西盃作客淨吞6蛋，期間得1個入球，而且彭美拉斯近6場得1次保持清白，防線絕對算唔上穩陣，信得過哥列迪巴踢爭氣波就捧主W。　首回合：哥客負０：２
巴西盃賽制：

採主客兩回合淘汰制，今輪為決賽次回合，若總比數相同，作客入球較多一隊勝出，再和則於次回合後隨即互射12碼決勝。