山度士強爆甘美奧

猪拉多纳

巴甲踢咗7輪，最令人失望嗰隊肯定係山度士！事關呢支傳統勁旅家陣仲未開齋，適逢倫敦奧運月底殺到，「衝金三子」尼馬、甘素同拉菲爾卡比爾踢埋今場就鬆人，今晚主場出擊對住天殘地缺嘅甘美奧唔開齋等幾時？山度士讓半一2.05倍上盤抵博！

（開賽時間：周一凌晨3:00）

啱啱同前鋒波捷斯解約嘅山度士，日前拿拿聲簽入踢過明尼路嘅鋒將祖奧柏度，呢位後生仔前日參與首課操練已經射入靚波，據講今戰好大機會夥拍尼馬合作攻堅，兩件前鋒都咁快咁好扭，甘美奧班守將肯定有得震冇得瞓！
甘美奧左路癱瘓

最重要係門將拉菲爾卡比爾、中場甘素同前鋒尼馬踢埋今仗就要向巴西奧運隊報到，準備去倫敦「衝金」，山度士嚟緊條路肯定仲難行，今鋪唔攞3分嘅話點掂？左閘富斯利左足踝受傷肯定缺陣，預計新加盟嘅守將般奴皮利斯會擔正，照計對防線冇乜大影響。

對家甘美奧近4場聯賽輸咗3場，近況唔係叻過山度士好多，最濕滯係祖利奧施薩、柏拿同奧利里奧3位左腳仔全部打柴，左路可以話係癱瘓，加上翼衞安達臣比高、中場朗迪連尼同守將艾迪臣甘馬雷斯都要坐波監，陣容殘成咁輸鑊勁有乜出奇！