柏雷素爾鯨魚駁火演入球騷

猪拉多纳

柏雷素爾今晚日職主場對名古屋鯨魚，對攻格要玩入球大。賽前柏雷素爾有右閘酒井宏樹離隊轉投漢諾威，難免影響防守力。另一方面，鯨魚射手永井謙佑踢埋呢場就要為日本奧運隊備戰，最近佢着晒火擺明「騷哥利」，暫別在即當然唔想畀佢停！（now631台周六晚6:00直播）

自從習慣兼顧亞冠盃賽事後，柏雷素爾就回復上季以升班球隊身份，奪得日職冠軍嘅神奇表現，連盃賽近9場有7勝1和1負，期間有7場至少入兩球，包括上周以6:2狂勝飛腳，送別到德甲發展嘅酒井宏樹，射手田中達也同MVP李安度杜明基斯都撻番着副偈，火力絕對有保證。

另一方面，鯨魚喺亞冠盃出局後近4場有2勝2和，期間攻入8球，證明開始將集中力放番喺聯賽。雖然鯨魚前鋒玉田圭司仲未好番，不過永井謙佑最近「4戰連發」（連續4場入球），似乎想用行動證明佢比玉田圭司更適合打正選，加上門將楢崎正剛未知好番未，作客柏雷素爾鬥攻入球騷唔難開。