我撐西班牙冧莊

猪拉多纳

終於打到嚟啦！唔係講風球，唔係講遊行，我係講今晚上演嘅歐國盃決賽，由我至愛嘅西班牙決戰轟走我另一愛隊英格蘭嘅意大利。我絕對相信，西班牙今晚將會幫我為英軍報仇，打破冠軍衛冕唔到嘅傳統，創歷史咁連續兩屆成為歐洲霸主。

我身邊好多人都話今屆西班牙踢得完全冇霸氣，雖然依家有好多同事同朋友間唔中都會教吓我隊球打咩戰術、點樣用人，但係我好多時（尤其是對住我嘅愛隊）都係傾向女性睇波方法──憑感覺、純支持，你哋話西班牙冇霸氣，我又覺得踢波除咗實力，運氣都好緊要，好似德國咁呀，今屆人人都話佢踢得好啦，全勝姿態入4強，有晒冠軍相，上場咪又係攻極唔入，4強出局。而且鬥牛勇士們本身就係有實力，只要加上一點運氣，同埋陣中好似沙比阿朗素、費托、法比加斯都要爭取入球做今屆神射手，佢哋一定會主動出擊嘅，所以我撐西班牙贏波o架！

仲有呀！嗰日係《撳快錢》開工見到Keyman，佢就話如果真係西班牙對意大利，唔單止係前鋒對攻戰，亦係兩個龍門嘅穩健程度大測試，佢就買保方實可以保住後方，我就話卡斯拿斯神勇無比，呢場牙骹戰睇吓邊個會贏。