水手冇中村難追捕鯨魚

猪拉多纳

今日黃昏日職有一場直播中游大戰，由橫濱水手主場對名古屋鯨魚。水手近期火力本來已經麻麻，「司令塔」中村俊輔仲打埋柴，對住有大勇射手永井謙佑孭飛嘅鯨魚好難全取3分，鯨魚受讓梗係捧1.54倍「讓球客勝」啦！（now633台周六下午5:00直播）

橫濱水手近期慶祝緊創會20周年，今日主場對名古屋鯨魚，仲會大搞少女節，希望吸引多啲美少女球迷入場「應援」，聲勢本來幾浩大，可惜佢哋近況奇差，對上6戰只得1勝4和1負，其中4場仲同對手打成0:0。上周聯賽作客川崎前鋒，進攻中場中村俊輔仲整傷左腳關節，賽後證實要抖一個月，佢嘅中路拍檔小椋祥平同後衞天野貴史又未好番，今日對住鯨魚莫講話要搶分，真係想入球波都難。
鯨魚射手永井謙佑大爆發

對家鯨魚近期爆傷兵潮，繼前鋒玉田圭司、高原幹、中場璣村亮太、中村直志同後衞新井辰也後，門將楢崎正剛近日亦因左膝受傷要做小手術，坐底抖一個禮拜，不過近3場仍取得2勝1和佳績，全因超新星永井謙佑大爆發，喺呢3場勁入5球，預計今場有副選門將西村弘司傷愈復出，坐和望贏唔難。