飛腳操弗大起鯨魚

猪拉多纳

日職開快車，大阪飛腳主場迎戰名古屋鯨魚，飛腳啱啱取得兩個月來首場勝仗兼作客開齋，雖然只贏弱旅札幌岡薩多，但客場轟入四粒總算有番啲火力，今次硬撼鯨魚唔會做縮頭烏龜咁衰仔，兩軍近十次交手九次開大，熱捧大盤！（周三晚6時開賽）

大阪飛腳貴為日職名牌球隊，依家淪落到排尾三，確實非常折墮，上仗喺護級決戰作客發癲狂攻札幌岡薩多，半場已入三粒早早奠勝，近況似乎好咗！前線外援保連奴奧利華拉開始上力，靈魂人物遠藤保仁亦入咗個罰波，橫掂順開，今次返到主場冇理由唔繼續攻。

名古屋鯨魚今季戰績亦唔好，主要因為澳洲高佬射手約舒亞堅尼地長期受腰傷困擾，表現跌晒Watt！「左腳王」玉田圭司近期左腳做完手術要抖，好彩前面仲有奧運腳永井謙佑近兩戰入三粒，呢個靚仔跑得又射得，非常叻仔！兩軍近十次對戰九次開大，近八次碰頭全大，要大啦！
天鵝松鼠捱「細」界

同日日聯盃最後一輪分組賽，多場例行公事冇乜意義，開乜都得比較難搞，一於改玩大細。重心場次揀B組新潟天鵝主場對大宮松鼠，天鵝分組賽五戰五細，近五戰入得一粒，松鼠作客唔掂，今場都係水鬥水，要細盤。