德國-1要希臘嘔凸

猪拉多纳

歐國盃八強戰，德國於波蘭格但斯克PGE球場出戰希臘，於死亡B組全勝出線嘅德國已晉升為2.95倍並頭奪標大熱，今仗有消息會「華麗變陣」務求加強進攻效果，面對實力見底兼陣容不整嘅希臘有力輕鬆過關，黑柴推介2倍「讓球主勝」。（now 632及 660周六凌晨2時45分直播）
德軍勢必變陣強攻

德國隊分組賽於B組接連擊敗三支世界前十名勁旅首名出線，不過舉國上下對球隊要求同期望都非常高，經過上仗贏丹麥後依然批評不絕，名帥馬加夫更指領隊勒夫浪費人才，未能善用「神級」鋒將高路斯與一眾天才舒賀爾尼、馬高列奧斯及馬里奧葛斯。勒夫賽前亦承認，球隊在中場創造力與前線把握力都有待進一步改善，在近日操練中，上述球員經常在分組賽獲安排於主力一方演練，德國《圖片報》更預測高路斯將會取代馬里奧高美斯擔任正選，兩名近日操練欠完整嘅中場舒韋恩史迪加同奧斯爾未必踢足全場，今仗隨時變招增強取分籌碼。
將帥「封嘴」顯決心

今仗比賽場地格但斯克距離佢哋酒店大本營只有十公里，免去舟車勞頓，德軍賽前亦高度集中，包括勒夫同中場硬漢基迪拉都拒絕談及準決賽可能遇上英、意嘅問題，顯示對今仗對手希臘嘅尊重，絕對唔會出現輕敵情況。
希臘殘陣回唔切氣

希臘於分組賽最後一戰爆冷擊敗俄羅斯出線，成功法寶係嚴密防守加上把握僅有機會嘅效率驚人，不過球隊老化同陣容不整問題嚴重，今仗中場大腦兼隊長加拉高尼斯停賽，取代佢嘅防守中場馬哥斯無論技術同經驗都差很遠，要喺由守轉攻中Hold住個波都有困難，防線面對德國強攻更難回氣。兩軍實力近況皆懸殊，希臘係德國隊今屆大賽所遇上嘅最弱對手，若然德軍能於早段取得入球，大勝可期。
近8次交手往績

日期 賽事 賽果

28/05/01 世盃外 希臘 2:4（2:2） 德國

02/09/00 世盃外 德國 2:0（1:0） 希臘

17/06/80 歐國盃* 希臘 0:0（0:0） 西德

11/10/75 歐國外 西德 1:1（0:0） 希臘

20/11/74 歐國外 希臘 2:2（1:0） 西德

22/11/70 熱身賽 希臘 1:3（0:2） 西德

22/10/61 世盃外 西德 2:1（2:0） 希臘

20/11/60 世盃外 希臘 0:3（0:3） 西德

註：*為中立場