葡萄牙愈踢愈醒神 Fake爆冇腦捷克

猪拉多纳

Yeah！終於嚟到8強戰喇！今晚首場半準決賽由A組首名捷克對B組次名葡萄牙。捷克能夠取得A組首名，皆因同組對手冇料到，今仗佢哋個「大腦」路斯基有傷冇正選，擺明唔夠啱啱有C朗大爆發嘅葡萄牙砌，1.68倍客W係亨利心水之選。（now632台、廣東體育及中央5台周五凌晨2:45直播）

葡萄牙喺今屆歐國盃嘅表現，可以用漸入佳境嚟形容。自從舊嗰班黃金一代費高同雷哥斯達等人喺國家隊退役後，接棒嘅C朗、拿尼同魯爾梅利斯等，畀人感覺都係個人主義大過天，有波在腳點都要舞番一陣先交波，毫無紀律可言。
質素默契兼備有霸氣

不過嚟到今屆歐國盃，呢班球星已經愈踢愈成熟，球員之間交波多咗，默契好咗，成隊波無論踢法同鬥志都夠晒霸氣，上仗佢哋能夠反敗為勝踢荷蘭返屋企，更加係佢哋近年代表作！係，你可能會話荷蘭今屆跌哂Watt，擊敗佢哋不足為據，但葡萄牙由C朗拍住拿尼同摩天奴嘅進攻組合，每次轉守為攻打反擊都係勁到冇朋友，對手冇三幾個招呼佢哋，肯定搞呢班大佬唔掂！咪忘記佢哋條防線仲有個一夫當關嘅比比，呢位皇馬守將及時傷愈，可以趕及喺今戰披甲，葡萄牙自然無後顧之憂啦！
捷克Icon路斯基做後備

對家捷克今屆表現唔算突出，亨利認為佢哋入到8強已經心足。最慘係佢哋件首席球星路斯基因為腿肌腱傷，踢完第2場分組賽後已飛返祖家布拉格醫治，到前日先番波蘭弗羅茨瓦夫歸隊，頻頻撲撲加上傷患未十足痊癒，路斯基狀態難免回落，即使話佢尋日已經後操，但估計佢要先做後備。講真，就算畀呢位阿仙奴中場末段帶傷出戰，但睇怕都扭轉唔到劣勢，對住葡萄牙凶多吉少啦！
橫數千軍

捷克旺開第一隊入球

‧同96年一樣，以負得失球差出線，當年捷克打入決賽。

‧分組賽得2勝1和首名出線。

‧連續2場先開紀錄。

‧2次出戰8強（96及04年）都未試過被淘汰。

‧林貝斯基、柏拉斯、柏赫特及丹尼爾高拿均有牌在身，多領一面黃牌就要停賽。
葡萄牙對賽五五波

‧近4屆出戰8強，有2次晉級。

‧最近2次8強戰都開大，前2次則開細。

‧分組賽得2勝1負出線。

‧曾經2次喺歐國盃對捷克，96年以0:1落敗，08年則贏3:1。

‧法比奧干查奧、普斯迪加、C朗、荷奧彭利拿及魯爾梅利斯若再領黃牌，就要停賽。
亨利推介：

葡萄牙（客勝）