山度士Fans少撐哥連泰斯

猪拉多纳

自由盃聽朝有好戲碼，由哥連泰斯同山度士合演4強次回合。一球在手嘅哥連泰斯為爭球會史上首個自由盃錦標，幾乎放棄聯賽，次回合肯定唔放過山度士，讓平半要上盤。（有線61、201及廣東體育周四早上8:50直播）

哥連泰斯今季聯賽幾乎場場出副選，頭5輪巴甲就輸咗4場，為爭自由盃作出極大犧牲，會長高比尋日表示，就算哥連泰斯喺自由盃出局，都肯定唔會炒教練，有利主帥迪迪備戰。
哥連泰斯自由盃11場不敗

呢支巴甲衞冕冠軍今屆踢11場自由盃都未輸過，仲只係失咗兩球，聽朝更有左閘法比奧山度士傷愈復出，韋利安高美斯亦夠晒Quali頂替停賽嘅馬斯奧艾馬臣擔正攻堅，整體戰鬥力一樣咁堅。

首回合主場出擊都要捱打兼輸0:1嘅山度士，今戰只獲分發1,300張波飛配額，聲勢肯定輸晒！賽前《世界體育報》話教練拉馬奴會改打433同哥連泰斯死過，但山度士今屆5場自由盃作客僅勝1仗，中場靈魂甘素又話大腿傷未好番缺操，作客焗攻隨時輸多鑊！

首回合：哥客勝1:0
自由盃及巴西盃賽制：

採主客兩回合淘汰制，今輪為4強次回合，若總比數相同，作客入球較多一隊晉級，再和則於次回合後隨即互射12碼決勝。