數多幾粒垂死掙扎 意大利割愛必殺

猪拉多纳

歐國盃C組最後一輪畀「默契波」疑雲籠罩，但意大利無論點都好，想出線至少都要大炒愛爾蘭先有偈傾。好彩係愛軍已經篤定出局，鬥志麻麻兼夾豆腐防線信唔過，換上老來嬌迪拿達利擔正嘅意大利唔難大捷，「亨利」今晚撐硬1.9倍「讓主」。（now633、635台及中央5台周二凌晨2:45直播）
腦殘膝傷迪拿達利擔正

現時C組形勢混亂，藍衫軍根本係非勝不可，仲要睇埋另一邊戰果，隨時會重演04年畀丹麥、瑞典夾計「整個2:2世紀和局」屈咗出局嘅慘況。不過以防最後隔離踢成1:1，要同西班牙及克羅地亞計得失球，意大利依然要盡全力大數贏波。

事實上，意大利喺之前2輪都係先贏後和，如果是但一場可以領先到尾，就唔使搞到今日咁嘅田地啦！上場賽後，意大利主帥柏蘭迪利話球隊射門把握力差，仲話今晚一定會變陣，好大機會以迪拿達利頂替巴洛迪利。
愛爾蘭唔肯鬆章老將孭飛

講真，「亨利」其實唔多認同柏帥見解，「腦殘」雖然喺首戰西班牙單刀夢遊，但佢始終係射術同技術兼備嘅頂級射手，要變都係將狀態普通嘅卡斯辛奴換走。不過，最新消息係「腦殘」練波時膝部受傷，今晚點都唔踢得，柏帥惟有「割愛」改打「4312」，焗住用卡斯辛奴拍迪拿達利攻堅，迪羅斯打番中場，不過對住愛爾蘭條豆腐防線應該夠殺有餘，加埋後防線有巴沙利復出，就更加無後顧之憂啦！

另邊廂嘅愛爾蘭，意大利籍主帥查帕東尼同柏蘭迪利都有密切關係，30年前柏帥原來跟過查伯踢波，今晚話唔定查伯會鬆章畀「徒弟仔」。賽前查伯話為咗避嫌，今場會盡量出番原班人馬，即係老將羅比堅尼、基雲同杜夫等會繼續掛帥，不過用番呢班人，始終速度同活力都不足，想頂住對手狂攻有難度，藍衫軍今晚贏2、3球真係話咁易！

亨利推介：意大利（讓球主勝）
橫數千軍

 意大利先開紀錄冇着數

‧若今仗無法獲勝就會出局。

‧近5次對賽得1勝，其餘4場為2和2負。

‧首次連續6場於正式大賽不勝（5和1負）。

‧上次（04年）於歐國盃連和首2輪分組賽後，即使第3輪獲勝亦要出局。

‧於近5場先開紀錄嘅歐國盃賽事中，僅得1場勝出。

 愛爾蘭歐國盃3連敗

‧近3場歐國盃賽事均落敗，共失8球。

‧連續2場分組賽都係先失波，兼且開大。

‧14場不敗走勢結束後經已連輸2場。

‧上場落敗後，成為今屆首支出局球隊。

‧首2場分組賽，對克羅地亞及西班牙分別失3及4球，連破2次大賽失球紀錄。