市原弗爆狙擊綠茵

猪拉多纳

日乙上演榜首大戰，東京綠茵主場對千葉市原，市原近期弗到爆燈，作客連贏五場，銳不可當，隊中攻擊球員全部着晒火，今次於巔峰對決硬撼綠茵，絕對有坐和望贏之力，有得受讓一於捧「讓球客勝」！（周日下午５時開賽）

日乙名牌球隊千葉市原以往靠主場搵食，今季完全轉晒款，近期接連於客場有佳作，包括作客六比一大數弱旅町田澤維亞，對手雖弱，但都要有強勁火力及信心先可以於作客環境下大勝。市原前線擁有藤田祥史及田中佑昌攻堅，兩大射手級數高，夠料踢日職，有力撕破對手防線。綠茵今季主場九戰五勝，但對手冇乜硬嘢，今戰難贏。
愛媛頂得住漩渦

同日德島漩渦主場對ＦＣ愛媛，漩渦今季演出一再令人失望，大軍於主場十戰四勝，所贏對手現時排名全部低過十五位，欺善怕惡，遇上同級球隊冇贏波把握。愛媛本身主場叻啲，但近期作客都踢得唔錯，近六次作客只輸過畀勁旅千葉市原，演出已算相當平穩，今場面對漩渦頂得住，受讓可捧「讓球客勝」！