軍刀鐵頭功要Encore

猪拉多纳

時間真係過得快，歐國盃分組賽已經超過一半，今晚就係最後一組次圈賽事。呢幾日我聽到好多支持英格蘭嘅朋友話心情忐忑、好擔心，因為英軍上場畀法國起勢攻，守得好驚險，今場就對暫時一分都冇嘅瑞典，好驚英格蘭又失分，影響出線。

好彩我係無黨派支持者，我只想睇好波，邊隊出線我都ＯＫ，不過我都有少少偏心，想舒夫真高今晚再上演絕頂鐵頭功，為烏克蘭入多幾粒贏波，向全世界表明：運動員無年齡之分，只要有心，上到場盡全力就係好運動員。
上網搵料方便好多

近排發覺隨住科技發達，依家睇波同搵相關資料方便咗好多，喺公司甚至錄影廠，好多同事閒時都喺度手指指、撥來撥去上網搵料，而我哋亦多咗好多渠道可以同大家分享睇歐國盃所見所聞，我同另外兩位女主持亦喺「足球追蹤」app分享場內場外鮮為人知嘅事。依家做評述員相對幸福好多，有最Update新聞、專家分析及賽後報告，搵料都方便好多。

前幾日忙於法網直播睇唔到歐國盃直播，我都喺廣告時段用app睇比數㗎！