意大利愈變愈克

猪拉多纳

首戰賽和奪標大熱西班牙嘅意大利，今晚C組第2輪面對克羅地亞同樣變陣出擊，改踢較為進取嘅442爭取士哥。不過「藍衫軍」向來擅守不擅攻，要佢哋擺大個頭踢進攻足球搶分隨時出事。最緊要係佢哋今仗撞正命中「克」星，歷來5鬥格仔軍未贏過波，意大利讓平半，梗係捧1.85倍下盤啦！（now632台、廣東體育及中央5台周五凌晨0:00直播）

飽受國內假波同球員賭波醜聞困擾嘅意大利，上場對住衞冕冠軍西班牙，踢落竟然係威係勢，仲要係先入波一隊，最終踢成1:1絕對有交代。不過，咪話力奇唔提醒大家，呢場波意大利係預咗打守勢波，將一向踢防中嘅迪羅斯移埋落防線，變為3412陣式派大量人手做防務，但今仗佢哋對住克羅地亞要搶3分爭出線，領隊柏蘭迪利已經話明會再慎重考慮變陣嘅可能。
迪拿達利頂腦殘擔正

柏蘭迪利所謂嘅變陣，消息指其中一個轉變會係由上場入波嘅迪拿達利，取代「單刀夢遊」嘅巴洛迪利擔正。至於上仗轉踢中堅嘅迪羅斯，亦大有可能推番上中場線，轉番慣常嘅442陣式，主要係想增強番「藍衫軍」整體攻擊力。

不過咪話力奇潑冷水，依家嘅「藍衫軍」根本擅守不擅攻，對住西班牙打穩守突擊有好發揮，並唔代表佢哋主攻都會掂。睇番之前熱身賽3連敗，佢哋對住啲二三線球隊時進攻無從入手，今晚隨時歷史重演o架！
格仔兵5次交手不敗

事實上，克羅地亞上仗3:1輕取愛爾蘭表現令人驚喜，「新空中霸王」文迪蘇傑同謝拉域踢法各具特色，但同樣威力十足，加埋中場莫迪歷嘅穿針引線，呢個進攻鐵三角唔講得笑。何況佢哋自1991年由前南斯拉夫分裂獨立後，先後5鬥意大利竟取得3勝2和不敗佳績，擺明係格食格啦，今晚仲有乜好驚先？
橫數千軍

意大利連熱身賽4戰不勝

‧連熱身賽計算，連續4場不勝，係自2010年8月後最長嘅不勝走勢。

‧喺大型賽事決賽周已經連續5場不勝。

‧上仗迪拿達利入波結束球隊360分鐘入球荒。

‧迪拿達利係目前意大利陣內入球最多球隊，上陣38次入11球。

克羅地亞近4場分組賽贏晒

‧自91年獨立後，唔計算奧運，共5次對意大利得3勝2和不敗。

‧同巴西係當今僅有2支近5次對意軍不敗球隊。

‧近4場歐國盃決賽周分組賽全勝。

‧文迪蘇傑係繼蘇加後第2位喺決賽周梅開二度嘅克羅地亞球員。