小保加鬥智大主W有計

猪拉多纳

當歐國盃進行得如火如荼之際，聽朝仲有場南美自由盃4強首回合大戰上演，由阿根廷名牌小保加迎戰智利大學。以波論波，佔主場之利嘅小保加稍為秤先，該隊勢必想用一場勝仗結束3連和，主W屬斯維嘅心水之選。

（有線61及201台周五早上7時15分直播）

兩軍能夠殺入4強，大家實力都有番咁上下。不過，作為阿根廷傳統班霸，小保加級數上仍然稍高，除中場老將列基美老而彌堅外，柏保路莫治、施維坦歷治、恩沙奧拉迪、柏保路列迪斯馬均具備破關能力，進攻相當多元化，球隊入波分布平均，冇話集中在某位球員身上，令對手防不勝防。

小保加近期連和3場，似乎正處小低潮，但留意其中兩場屬唔多重要嘅阿根廷盃賽事，大有留力之嫌，加上近10場主場賽事未嘗一敗，今仗幾乎立於不敗之地。小保加剛於聯賽面對包尾嘅班菲特，開波冇耐便打多人一個，竟然先失一球，但大部分時間圍攻的情況下，僅靠對方嘅烏龍波扳平，被傳媒大肆批評，非常羞家。作為傳統勁旅，小保加當然唔想衰落去，今仗勢必打場爭氣波挽回面子，用自由盃決賽資格塞住傳媒把口，加上主場出擊更加不容有失，因此鬥心毋庸懷疑。
智利大學作客唔掂

智利大學方面，佢哋喺今屆自由盃表現不俗，但作客表現就認真一般，近4次自由盃作客比賽僅錄1勝，在實力上稍遜一籌下，面對「主場王」小保加未必夠砌，相信主隊可小勝而回。由於雙方以穩為先，難免會踢得比較保守，呢場入球細同半場和都值得留意。