希臘場場慢熱點打啊！

猪拉多纳

歐國盃A組賽事，捷克終於復勇，佢哋對住只識踢下半場嘅希臘贏番場，出線重現生機，反觀希臘睇嚟已不復八年前之勇，出線機會相信係無望，因為佢哋場場都係慢熱，吓吓去到下半場先識踢，點打啊！捷克並非冇缺點，門神施治未能踢出喺車路士嘅水準，仲同隊友誤會累球隊失咗一球，佢哋極其量有機會同波蘭爭出線。
克羅地亞唔怕意大利

主辦國波蘭連和兩場，最後一戰要挫敗隔籬鄰舍捷克先可晉級，波蘭揭幕戰賽和希臘確係令人失望一點兒，第二場同狀態蠻勇嘅俄羅斯打成平手算係執番身彩，現時佢哋有兩分在手，最後一戰只要贏捷克即可出線，兩隊實力相近，波蘭有主場之利，相信可佔上風。至於俄羅斯今屆表現甚佳，對住希臘只要唔輸就出梗線，預期都可順利晉級。

C組賽事戲碼唔錯，頭場意大利對克羅地亞勢均力敵，仲可觀過尾場西班牙對愛爾蘭。意軍首戰對西班牙踢得超勁，不過，去到決賽周係高手過招，克羅地亞睇咗意大利上次表現識得見招拆招，論人腳克羅地亞唔輸蝕，絕對唔驚意軍，受讓抵玩。另外西班牙雖然冇上屆歐國盃同上屆世界盃咁勇，但要贏愛爾蘭唔難，不過，贏唔贏到兩球真係唔敢定斷。
金句：八強穩膽俄羅斯搭左鄰捷克或右里波蘭！