西班牙扭散愛爾蘭

猪拉多纳

今晚歐國盃C組上演老鼠仔玩殘大笨象！上屆盟主西班牙主力如沙維、恩尼斯達以腳法秀麗見稱，遇上以「大笨象」李察鄧尼為首嘅愛爾蘭防線，呢次仲唔係予取予攜嘅好機會，西班牙「讓球主勝」值捧。

（now 632及660周五凌晨2時45分直播）

眾所周知，西班牙中前場個個都技術出眾，經常憑短傳入滲嘅小組配合，撕破對方防線，加上呢班球員身形矮細重心低，要搶佢哋個波絕非易事，尤其是對住一班「高大衰」守將特別佔優。

當然，西班牙都好怕面對密不透風嘅鐵桶陣，不過今場對手愛爾蘭例外。雖然愛爾蘭喺金牌教頭查帕東尼麾下，依然以穩守突擊為主，但睇下佢哋條防線，無論係李察鄧尼抑或奧沙，都係以轉身慢、冇速度見稱，今仗遇上一班西班牙「老鼠仔」，愛爾蘭注定冇運行。
法比仔施華個個射得

除咗身高稍為遜色，論實力、狀態、信心，鬥牛國瓣瓣贏晒，尤其係射手韋拿冇份出戰下，眾將如法比加斯、恩尼斯達、大衞施華都要分擔入球重責，更令敵軍防不勝防。愛爾蘭被迫主守，又冇突擊本錢，西班牙要贏兩粒冇難度。另外，愛爾蘭上仗錄得零角球紀錄，面對控球力強嘅西班牙，預計唔會有太多角球，可考慮埋角球細。