千葉夠野心「主勝」進「取」

猪拉多纳

日乙今個周中又開快車，「二哥」千葉市原今晚喺主場對住排尾3嘅鳥取飛翔，「讓球主勝」熱到得1.48倍都要捧。為保直接升班席位，最近千葉市原向柏雷素爾借用射手列卡度盧保，相反鳥取已經連續8場派39歲嘅「前港甲球員」岡野雅行打正選，明顯冇人用，作客唔似惡得出樣。（開賽時間：周三晚6:00）

今季千葉市原雪藏長人中鋒艾萊，射手深井正樹又入球率大跌，想保住前2名直接升班，淨係靠田中昌佑同藤田祥史入波唔多夠，千葉高層借用列卡度盧保，擺明要爭取重返日職。雖然盧保轉會柏雷素爾後唔受重用，更加未入過波，而且呢場亦未必趕得切上陣，但可以預期，決定加碼嘅千葉嚟緊必搏，主場有殺無賠。
鳥取仍重用老將岡野雅行

對家方面，鳥取飛翔連輸4場近況差到喊，期間仲先後試過以2:5不敵FC橫濱、1:5慘負山形山神，防線嚴重不穩，而且教練吉澤英生最近唔知食錯乜，竟然連續8場派前幾年到香港踢天水圍飛馬嘅岡野雅行擔正。平心而論，「野人」雖然一把年紀，但佢老大哥地位的確可以帶起士氣，弊在佢今季仲未開齋，實際作用有限，咁搞法「真的不行鳥」。