丹麥唔驚葡萄牙

猪拉多纳

今晚死亡B組另一場「宿敵對決」，就係丹麥喺烏克蘭利沃夫迎戰葡萄牙，兩隊近年喺世盃同歐國盃外圍賽經常同組交手，熟路到爆。查實葡萄牙除咗名氣大根本冇嘢叻，火力尤其不濟。反觀丹麥穩守突擊足球效率高，最緊要係佢哋近年剋死葡軍，「中堅賓」賓特拿對住葡萄牙又場場入波。今晚葡萄牙讓平半，我撐2.18倍下盤！（now632台、廣東體育及中央5台周四凌晨0:00直播）

丹麥首仗爆冷1:0勇挫荷蘭暫居榜首，論表現唔算特別出色，幾乎大部分時間畀荷蘭圍攻，但始終踢法實際，球員又夠鬥志。當日表現最值得讚賞嘅，首推門將史堤芬安達臣，呢位因為正選門將蘇連遜退隊先有得擔正嘅法甲伊維恩門神，全場屢救險球，仲記得92年丹麥奇迹捧盃嗰陣，就係有個超級門神舒米高，唔通今鋪又會奇迹再現？
丹麥近4次交鋒2勝2和

除咗後防出色，丹麥嘅進攻其實算唔錯。中場新星基斯甸艾歷臣、快翼羅美度、高恩迪利同箭頭賓特拿默契幾好，火力唔差。更令力奇期待嘅，係「中堅賓」原來過往4次對住葡萄牙竟然場場有波入，真係唔講得笑。力奇查過近績，丹麥喺今屆歐國盃外圍賽同2010年南非世盃外圍賽，都係同葡萄牙同組，合共4次碰頭就取得2勝2和，試問今次碰頭又有乜好驚先？
葡軍死火4戰入1粒

事實上，葡萄牙近況持續不振，踏入2012年踢4場波未贏過，仲要只入1粒。前線除咗C朗真係有卡士，其餘鋒線球員包括普斯迪加、拿尼同哥利斯馬等，真係冇乜邊個信得過。佢哋進攻踢法單調，容易畀丹麥嘜死，仲點讓得起波吖！
丹麥正式比賽5連勝

‧近7場正式比賽不敗，近5場正式比賽全勝。

‧前鋒高恩迪利在近3場正式比賽均有入波。

‧歷來僅1次在大賽決賽周同葡萄牙交手，為96年歐國盃踢和1:1。

‧近5次交手得3勝1和1負，4場開入球大。
葡萄牙大賽唔識入波

‧近4戰僅入1球，近7戰更只得1勝。

‧近7場大賽決賽周賽事僅得1勝，當中5場冇波入。

‧首席射手C朗在外圍賽入7球，但自去年11月附加賽後便陷入球荒。

‧近6戰得1勝3和2負，當中5場開入球雙。