山度士主宰哥連泰斯

猪拉多纳

除咗歐國盃外，呢排法達斯維都鍾意玩下美洲波，明早有兩支巴西球隊山度士同哥連泰斯，合演南美自由盃四強首回合大戰。雖然雙方近況麻麻，但千祈唔好畀個績呃到，山度士明顯為自由盃暫時放棄聯賽，因此主隊山度士值得睇高一線，呢個上盤不容錯過。（有線61及201台周四早上8時50分直播）

對於山度士嘅曳績，斯維不以為然。首先，巴西國家隊呢排要踢幾場熱身賽，徵召咗山度士門將拉菲爾卡比爾及前鋒尼馬，冇咗尼馬影響都幾大，山度士一向靠佢數胡，近期聯賽有三仗冇波入，咁蹺尼馬都係缺陣，可見呢位巴西新星嘅重要性。
4強戰吼「細」啱數

其次係作為上屆自由盃盟主，山度士一心想蟬聯錦標，因此該隊經常於自由盃前嘅聯賽留力。由於自由盃地位等同南美歐聯，又踢到四強階段，山度士無理由唔搏埋佢，暫棄聯賽亦屬人之常情。

相反，哥連泰斯今季毫無生氣，「肥祖」阿祖安奴被解約後，只靠老將列特臣攻堅，連入波都成問題，在實力大削下，面對抖足、又有尼馬歸隊嘅山度士，點秤都唔夠砌，山度士小讓平半非常抵玩。雙方近期踢法保守，預計呢場「巴甲內訌」會踢得小心翼翼，可以考慮埋入球細。