荷蘭好波唔怕魔咒

猪拉多纳

好緊張呀！雖然今晚歐國盃無我嘅愛隊西班牙，但就有「死亡B組」嘅第二輪比賽。我諗我鍾意西班牙太深入民心啦！好多時大家見到我，都只係同我講「今年係咪捧西班牙呀？」、「西班牙出師不利喎！」、「無西班牙你唔睇o架啦！」

個個球迷心目中都有自己好支持嘅球隊o架啦，咁佢哋係咪真係完全唔欣賞其他球隊先？仲有好多人覺得女仔睇波只係睇靚仔同陪男朋友睇。
睇波唔只係睇靚仔

其實，依家好多女仔都真係投入比賽氣氛，同欣賞球員嘅付出，我唔係「足球達人」，但做《撳快錢》拍Keyman都學到啲嘢，我知道最愛嘅西班牙衞冕當然係大熱，另外荷蘭、德國、法國、葡萄牙、英格蘭都係熱門。不過，B組雲集三大熱門，由其係上屆世盃亞軍嘅荷蘭，但係佢哋首場偏偏又輸一粒畀丹麥，大家跌晒眼鏡，仲即刻有報道話佢哋中咗魔咒，打破唔到通常世界盃亞軍球隊就多數歐國盃分組賽出局……但係我唔信o架！事關荷蘭好波就唔使怕魔咒！

另外，我仲希望丹麥繼續神勇，贏埋葡萄牙，等多啲人再跌眼鏡，就算有C朗在場又如何？睇波唔係淨係睇靚仔嘅！