德軍送荷蘭一程

猪拉多纳

死亡B組今演重頭戲，荷蘭德國冤家聚首，首仗全失三分嘅荷蘭作背城借一殊死戰，不過面對實力相當嘅德軍焗攻形勢相當不利，賽前更傳出連串內訌消息，無論喺心態同團結性方面都不如德國，黑柴相信德軍會乘勢送宿敵一程，德國讓平半有高水，宜捧上盤。（now 632及660周四凌晨2時45分直播）

荷蘭同德國多年來都係宿敵，荷蘭近年人腳實力更在德軍之上，但雙方於國際賽場所獲成就卻相差甚遠，皆因荷蘭大牌球星個個自我中心，一向欠缺團結精神，兩年前世盃決賽周成績好就順風順水，問題總算壓得住，但成績一差就會出事。荷蘭首仗分組賽全場圍攻丹麥，卻遭對手爆冷擊敗，賽後立即爆出內訌，史奈達、雲達華治等唔妥獨食嘅洛賓，尼祖迪莊唔妥老將雲邦美受恩寵，亨特拉爾同雲達華治亦唔妥要居於後備，領隊雲馬維克喺研究破敵之策嘅同時，仲要分心浪費時間諗點樣平息紛爭。
德國解除後顧之憂

德國首仗1:0險勝葡萄牙，表現雖然仲有好多不足之處，但領隊勒夫依然滿意，仲特別盛讚防線表現，事實上德軍一向唔擔心攻力問題，防守至係佢哋唯一弱項，但從擊敗葡軍所見，曉姆斯、畢斯杜巴同謝路美保定呢幾個賽前令人懷疑嘅守將表現都稱職，大大減輕後顧之憂。德軍贏得首仗後心態上更有士氣，今仗遇上必然搶攻嘅荷蘭，大可採突擊踢法，勒夫亦考慮畀年輕嘅舒賀爾尼同馬高列奧斯等快馬落場，突襲荷蘭大營。
荷蘭焗攻自亂陣腳

荷德兩軍實力原本旗鼓相當，不過目前雙方心態同團結性已見高下，急躁嘅荷蘭搶攻只會自亂陣腳，德軍隨時會把握機會終結荷蘭進級希望。