墨西哥贏卡士夠「薩」氣

猪拉多纳

墨西哥喺聽朝場中北美區世盃外圍賽第2組作客薩爾瓦多，雖然場波就冇直播，但投X價值就唔低，事關睇近績同班底，客軍都贏幾條街，大家睇歐國盃之餘，不妨小注墨西哥嘅2.32倍「讓球客勝」！（開賽時間：周三早上9:30）

講起墨西哥，好多球迷都淨係會諗起曼聯射手查維亞靴南迪斯，不過千祈唔好忘記連續3場國際賽有波入嘅杜斯山度士！雖然佢喺熱刺連冷板都冇得坐，但就自信心爆棚：「我唔會懷疑自己嘅能力，夏利列納唔信我，不過我練波嗰陣永遠付出100%㗎！」加上佢已經決心要喺今夏逃離「夏利叔」魔爪，國家隊賽事就成為佢唯一表演舞台。
薩爾瓦多以土炮做骨幹

睇埋近況，墨西哥近6場波得5勝1負，雖然意外輸過畀哥倫比亞，但係對威爾斯同巴西都成功派出2隻光蛋，今仗「小豌豆」、杜斯山度士同埋沙斯度齊齊發功，要大破以國內聯賽球員做骨幹嘅薩爾瓦多，絕對冇問題啦。

賽制：今輪為第3圈，12支球隊分3組踢雙循環分組賽，每組首、次名進身第4圈。