捷克「老殘」後防甩漏多

猪拉多纳

歐國盃決賽周16隊全部亮相，唔知大家心目中嘅銀行隊，又幫唔幫到大家搵番兩餐晏仔呢？歐國盃未開打前，「亨利」就揀咗兩隊波拎嚟長追，其中一支就係揭幕戰出過場嘅希臘，今場佢哋對老弱殘兵捷克，自不然要一追再追，撐1.59倍「讓球主勝」！（now632台、廣東體育及中央5台周三凌晨0:00直播）

揭幕戰希臘對住主辦國波蘭，上半場完全輸晒形勢兼要先失波，臨完半場仲有後衞柏柏斯達夫普路斯兩黃一紅被逐，打少一個嘅劣勢下，邊有人估到之後嘅發展會咁峰迴路轉！下半場希臘先憑沙賓基迪斯執隻靚死雞扳平，之後再藉波蘭門將施捷斯尼禁區內侵犯沙賓基迪斯，領紅兼輸埋12碼，如果唔係加拉高尼斯宴客，希臘早就反勝袋走埋3分啦！
艾蘭柏柏杜普路斯抖半年

其實睇完場波，唔難發現希臘呢支04年盟主，喺加拉高尼斯做進攻重心下，靠基卡斯或者後備「奇兵」沙賓基迪斯打前，將一套穩守突擊戰術發揮得淋漓盡致，最緊要係班球員齊心得嚟又有鬥志，有一分喺手打底下，今場全心再靠穩守突擊戰術搶分，絕對唔奇。雖然今場有中堅柏柏斯達夫普路斯停賽，佢拍檔艾蘭柏柏杜普路斯又打埋柴證實抖半年，仲有中場科達基斯拉傷大腿養傷，但對住今時今日仲係靠緊巴路士、路斯基孭飛嘅捷克，形勢上唔見得太過輸蝕。
捷克進攻瓣數少難讓波

對家捷克上場畀俄羅斯毫不留情咁大炒，成場比賽俄羅斯已經唔逼唔搶乜滯，但捷克依然苦冇還手之力，進攻招數少得可憐，防守更加係漏洞百出，我真係睇唔到佢哋今場波憑咩嘢要讓波？就算話捷克防線會大執位，左閘卡特歷或會移任中堅，林貝斯基將擔任正選，但睇怕都幫唔到幾多，依然信唔過o架！「亨利」建議捧希臘「讓主」，夠狠嘅朋友，大可直取主勝，好大機會畀到大家驚喜。
亨利推介

希臘（讓球主勝）
橫數千軍

希臘踏入2012年全開細

‧近4次交手兩軍合共僅入1球。

‧上屆決賽周分組賽3戰全敗，上仗和波蘭係近2屆第1分。

‧2012年4戰全開入球細。

‧連續10仗均取得入波，但只得2仗射入2球，其餘均入1球。

捷克旺開半場和

‧上仗以1:4慘負俄羅斯腳下，係球隊喺歐國盃決賽周最大差距敗仗，兼決賽周3連敗。

‧5月起連熱身賽計連開3場大及入球單。

‧近6戰得3勝1和2負，當中5場開出半場和。