俄羅斯新舊沙皇 揮軍襲波蘭

猪拉多纳

東道主波蘭喺揭幕戰對希臘有頭威冇尾陣和波失分，今晚喺A組次輪分組賽於華沙主場迎戰俄羅斯，後者由「新舊沙皇」迪沙高耶夫同艾沙維統領嘅鋒線威力強大，對住見底嘅波蘭小讓平半我撐2倍上盤！（now632台、廣東體育及中央5台周三凌晨2:45直播）

波蘭同俄羅斯兩個東歐鄰國喺歷史上有唔少牙齒印，賽前雙方足總都呼籲球迷要冷靜，特別係俄羅斯球迷近排紀律麻麻，再惹麻煩嘅話隨時會連累球隊。場外關係複雜，場內自然各不相讓，就算話俄羅斯和波都出線形勢大好，力奇深信俄羅斯有經驗豐富嘅艾禾卡特領軍，肯定會以3分為目標，特別係佢哋只要贏波就即刻出線，點會唔搏先？
俄羅斯幾支大炮輪住上

事實上，俄羅斯首戰大炒捷克盡顯爭標奇兵本色，艾沙維難得重現鋒芒，迪沙高耶夫大爆發梅開二度搶鏡，更重要係佢哋後備席廂仲要有柏夫里約真高同普格恩耶克兩支大炮，輪流攻足全場，問波蘭點頂？

主隊波蘭上仗只踢咗半場好波，前半段藉地利係威係勢，但換邊後畀對手摸底後反而冇料到，始終只係歐洲二、三線球隊，咪以為恃住有多蒙特三寶就可以打橫行。
波蘭閉門集訓練防守

前日大軍練波後半段就玩閉門操練唔畀記者攞料，但領隊史梅達唔見得可以有乜奇招變化，最多係針對住助教胡比治所講，俄羅斯擅長打反擊而加強防守練習，以及考慮調任中場美亞斯祖斯基做正選。至於門將之位會由上仗後備登場勇救12碼嘅泰頓頂上，問題係佢擔正頂唔頂得住壓力又好難講，今晚遇上真正有實力嘅俄羅斯，睇怕都係3分全失。
橫數千軍

 波蘭守得穩勁開細

‧近3次非正式比賽碰頭，得1勝1和1負。

‧上屆首次打入決賽周，分組賽得1和2負，敬陪末席出局。

‧連今屆賽事，近2屆4場分組賽全部開細。

‧上輪對希臘嘅失波係波蘭近5戰唯一失球。

‧近6戰得4勝2和，有5場開入球細。

 俄羅斯分組賽4連勝

‧以俄羅斯名義參賽以嚟，除08年嗰屆歐國盃外，未曾試過喺分組賽出線。

‧連續15場不敗，取得8勝7和。

‧近12場只失過3球，其中1球就係上場對捷克所失。

‧連上屆在內，連續4場分組賽獲勝。

‧近6戰得3勝3和，有4場開入球細。